50 joar WAARK

Nederlandse Versie

Evaluatie jubileumtour Theatergroep WAARK
‘Haalfmaal of de macht van domhaid’

VIEFTIG JOAR WAARK

Vanwege t vieftegjoareg bestoan besloot Theoatergroep WAARK dat er n feestelke jubileumtour kommen mos. Mit acht speulers en drij muzikanten trok WAARK op tour deur Grunnen en Drìnt om heur 37^ste theoaterproductie zain te loaten.

“Haalfmaal of de macht van domhaid” wer deur t publiek enthousiast ontvangen as vrolek muziektheoater mit actuele inhold dat in t Grunnegers extroa noar veuren kwam.

Haalfmaal of de macht van domhaid

In ”Haalfmaal of de macht van domhaid” mouk t pebliek kennis mit oer-Grunneger Haalfmaal.

Hai wordt op dizze wereld zet moar krigt gain noam. Wat mout je den? Wel bist zunder noam? Kennen ze die serieus nemen of bist n haalfmale?

Op zien zuiktocht raaist pebliek mit hom deur Grunneger historie woarbie Haalfmaal terechte kwam in vremde en spannende omstandigheden. Mor ook n vroleke raais woar hai n bult roare dingen leert. Zoas hou t gas ien bodem kwam en wat duvel doar mit van doun haar.

Haalfmaal haar biezundere goaven; hai kon mensen helpen en zulfs n lutje wonder verrichten, moar n noam kreeg hai der nait mit.

Deur ogen van Haalfmaal hebben bezuikers kennis moakt mit Haarm Braandwiend, Knelske en Lammert de Benzineman. Elkenain het n verhoal veur Haalfmaal, moar n noam kennen ze hom nait geven. Ain moment denkt Haalfmaal dat Dood n noam veur hom het. Moar n noam mout je oet laifde geven worden: “Mien noam wordt mie geven deur de laifde. Moar woar kin ik mien laifde kwiet?”

Schriever Jan Veldman het zok veur “Haalfmaal of de macht van domhaid” inspireren loaten deur “Mistero Buffo”,  bedocht deur Italioanse schriever en regisseur Dario Fo dat in zeuventeger joaren deur Internationale Nieuwe Scene op de planken brocht is.

Ook verhoalen van Simon van Wattum, Sien Jensema en Grunneger legendes en spookverhoalen waren bronnen van inspiroatsie.

Mit muziek, optimisme, humor en nuchtere veerkracht let WAARK zain hou de Grunneger mentaliteit overleeft.

Muziek

Muziek speulde n belangrieke rol in veurstellen, dizze rol wer deur drij professionele muzikanten oetvoerd. n Dail  hebben zai zulf componeerd, n ander dail waren bewaarkens van laidjes van Wannes van der Velde (Internationale Nieuwe Scene), Bert Hadders, Harry Niehof en Marlene Bakker.

Aan elk lös verhoal wer n laid koppeld, begelaaid deur viool, gitaar, contrabas, accordeon en slagwaark. Deur de soamwaarken van acteurs en muzikanten kon je t mit recht muziektheoater nuimen.

Thema’s

Thema’s dij veurbie kwamen waren:
Geboorte, dood, waark, identiteit. Riek, aarm, vluchteling. Geleuf, ideoalen, complottheorieën, klimoat. Macht, verschil in stand.

Cijfers en resultaten

Mit 3065 bezuikers in Grunnen en 785 in Drenthe was “Haalfmaal of de macht van domhaid” onze best bezochte veurstellen ooit.

Wie kwamen in 25 dörpshoezen/lutje zoalen en 10 theoaters. 26 moal in Grunnen en 9 moal in Drìnt. 13 keer oetverkocht!

Publieksreacties